Мулоқоти Муқимӣ Нигора бо намояндагони Созмони ҳамкории иқтисодӣ ва рушд

1-уми октябри соли ҷорӣ Муовини Ваколатдор оид ба ҳуқуқи инсон – Ваколатдор оид ба ҳуқуқи кӯдак дар Ҷумҳурии Тоҷикистон Муқимӣ Нигора бо намояндагони Дирексияи идоракунии давлатии Созмони ҳамкории иқтисодӣ ва рушд (СҲИР) мулоқоти маҷозӣ анҷом дод.

Дар мулоқот Никол Дрю, таҳлилгари сиёсӣ оид ба шарикии глобалӣ, Иля Ходорковский, мутахассис оид ба таҳлил ва машварати сиёсӣ, ва Фридрих фон Тресков, корманди барномаи «Карло Шмид», аз Шуъбаи шарикии глобалӣ, адолат ва фарогирии Дирексияи идоракунии давлатии СҲИР, инчунин кормандони масъули мақомоти Ваколатдор оид ба ҳуқуқи инсон дар Ҷумҳурии Тоҷикистон иштирок намуданд.

Аснои мулоқот масъалаҳои марбут ба лоиҳаи ёддошти консептуалии СҲИР оид ба дастгирии идоракунии давлатӣ дар Тоҷикистон баррасӣ гардиданд.

Ҷонибҳо доир ба истифодаи стандартҳо, ташхисҳо ва абзорҳои татбиқии СҲИР, баланд бардоштани самаранокии идоракунии давлатӣ, таҳкими шаффофият, поквиҷдонӣ ва ҳисоботдиҳӣ, инчунин густариши дастрасӣ ба адолат ва волоияти қонун табодули афкор намуданд.

Дар мулоқот, ҳамчунин ба масъалаҳои беҳтар намудани сифати хизматрасониҳои давлатӣ, таъмини ҳуқуқи инсон дар шароити рақамӣ, пешгирии табъиз, таъмини баробарии гендерӣ ва махсусан, ҳифзи ҳуқуқҳои кӯдак таваҷҷуҳи махсус зоҳир гардид.

Таъкид шуд, ки татбиқи чунин ташаббусҳо метавонад ба таҳкими низоми идоракунии давлатӣ, баланд бардоштани сифати хизматрасониҳо ва рушди механизмҳои самараноки ҳифзи ҳуқуқу озодиҳои инсон, аз ҷумла ҳуқуқи кӯдак, мусоидат намояд.

Дар фарҷоми мулоқот ҷонибҳо омодагии худро ба идомаи ҳамкориҳои судманд ва табодули таҷриба дар самтҳои мавриди таваҷҷуҳи тарафайн иброз намуданд.