2 сентябри соли 2026 дар Китобхонаи миллии Тоҷикистон конференсияи ҷумҳуриявӣ бахшида ба 35-солагии Истиқлолияти давлатии Ҷумҳурии Тоҷикистон таҳти унвони «Рушди ҳуқуқи инсон дар 35 соли соҳибистиқлолии Тоҷикистон» баргузор гардид.
Дар конференсия намояндагони Дастгоҳи иҷроияи Президенти Ҷумҳурии Тоҷикистон, мақомоти ҳокимияти қонунгузор, иҷроия ва судӣ, мақомоти Ваколатдор оид ба ҳуқуқи инсон, муассисаҳои илмӣ ва дигар сохторҳои дахлдор иштирок намуданд.
Зимни конференсия масъалаҳои марбут ба нақши Истиқлолияти давлатӣ дар ташаккули низоми миллии ҳифзи ҳуқуқи инсон, такмили қонунгузорӣ, таҳкими фаъолияти мақомоти Ваколатдор оид ба ҳуқуқи инсон, ҳифзи ҳуқуқҳои кӯдак, инчунин нақши Пешвои миллат муҳтарам Эмомалӣ Раҳмон ҳамчун асосгузори ислоҳоти ҳуқуқӣ дар Тоҷикистони соҳибистиқлол ва Президенти Ҷумҳурии Тоҷикистон ҳамчун ҳомии ҳуқуқу озодиҳои инсон ва шаҳрванд мавриди баррасӣ қарор гирифтанд.
Дар идомаи чорабинӣ рӯнамоии китоби мақомоти Ваколатдор оид ба ҳуқуқи инсон таҳти унвони «Дастовардҳои Ҷумҳурии Тоҷикистон дар соҳаи ҳуқуқи инсон дар даврони 35 соли соҳибистиқлолӣ» баргузор гардид.
Дар китоб раванди ташаккул ва рушди низоми миллии ҳифзи ҳуқуқи инсон, дастовардҳо дар самти ҳифзи ҳуқуқҳои шаҳрвандӣ ва сиёсӣ, иқтисодӣ, иҷтимоӣ ва фарҳангӣ, ҳуқуқ ба баробарӣ ва озодӣ аз табъиз, ҳифзи давлатии ҳуқуқҳои истифодабарандагони хизматрасониҳои молиявӣ ва ҳуқуқҳои соҳибкорон, инчунин нақши Истиқлолияти давлатӣ дар таҳкими ҳуқуқҳои кӯдак ва ташаккулу рушди фаъолияти мақомоти Ваколатдор оид ба ҳуқуқи инсон мавриди таҳлил қарор гирифтаанд.
Китоб барои ҳуқуқшиносон, кормандони мақомоти давлатӣ, олимону муҳаққиқон, омӯзгорону донишҷӯён ва доираи васеи хонандагоне, ки ба масъалаҳои ҳуқуқи инсон таваҷҷуҳ доранд, тавсия карда мешавад.
Баргузории конференсия ва рӯнамоии китоби мазкур қадами муҳим дар самти омӯзиш ва таҳлили дастовардҳои Тоҷикистони соҳибистиқлол дар соҳаи ҳуқуқи инсон ва бозгӯ намудани нақши Истиқлолияти давлатӣ дар таҳкими низоми миллии ҳифзи ҳуқуқу озодиҳои инсон маҳсуб меёбад.
www.ombudsman.tj
